Колку и да не сакаме да признаеме, Денот на вљубените се слави и кај нас. Дел од паровите навистина сакаат овој ден целосно да си го посветат на врската, а други само се чувствуваат обврзани да купат подарок за да не им биде замерено за невнимателноста.
Датумот 14-ти февруари е сè поблиску, па сè побројни се мажите кои немаат идеја што да и’ подарат на својата девојка.
Со цел да ви помогнеме, решивме да ви го намалиме изборот и прашавме неколку дами што не сакаат да добијат за подарок за Денот на вљубените, а во продолжение со пополнување на анкетата вие откријте им што би сакале да ви подарат.
- Еднаш од еден дечко добив хулахопки со боја на кожа. Немам ништо против хулахопки, всушности и постојано ги носам, но со овој подарок не добив никакви вибрации дека ме сака, вели Ивана (27).
- Членарина за во теретана е супер подарок, но кога ќе ја добиеш за Денот на вљубените, ти доаѓа да го фрлиш сопственото момче низ прозор. За Валентајн сакаме чоколади и колачиња, а не некој да се обидува да ни каже дека мора да ослабеме, вели Ана (23).
- Парфемот е одличен подарок. Убаво мириса, романтичен е и со него нема утка – секоја жена сака парфеми. Но, постојат мажи кои наместо парфем купуваат дезодоранс. Можеби мирисаат фино, но дефинитивно немаат никаква врска со романтика, вели Ема (24).
- Еднаш бев во врска со дечко кој работеше во принт студио, а на Денот на вљубените бевме заедно само месец и пол. За таа пригода тој ми подари календар со негови слики, што можеби не е толку лош подарок кога си со некој во долга и сериозна врска, но во нашиот случај тоа беше многу чудно и непријатно. Раскинавме после неколку недели, а календарот секако заврши во корпата за отпадоци, вели Кате (26).
- Жените обожуваат убава долна облека која ги прави да се чувствуваат секси. Но, за Денот на вљубените од моето момче, со кое тогаш бев во врска цели седум години ми подари толку кичеста долна облека која воопшто не одговараше на мојот стил и која никогаш не би ја облекла. Како да воопшто не ме запознал сите тие години или како да не се ни потрудил да избере подарок кој би ми се допаднал. Страшно се разочарав и му реков дека за жал не ми ја погодил големината, вели Тамара (29).
- За да ме „изненади“ за Валентајн, моето момче купило два билети за натпреварот на неговиот омилен кошаркарски тим. Што се однесува до мене, јас воопшто не би си ни трошела време да одам на такво нешто бидејќи кошарката не ми е поле на интерес. Зарем не треба јас тоа да му го купам на него, а тој чисто како знак на внимание да ми подари барем едно чоколадо?, вели Дијана (22).
- Плишаното мече можеби би ме израдувало на 14 години, но не и на 27. Кога го видов само помислив: „што да правам сега со ова?“ Подобро воопшто да трошел време и пари и сосема да го занемарел овој ден, бидејќи ова „лигавење“ е уште полоша варијанта. Шише вино сосема ќе ја завршеше работата - ќе го испиевме и ќе имавме убава вечер, вели Анастасија (28).
