Со години наназад доделувањето на Оскарите е моментот кога холивудските диви имаат можност да блеснат во полн сјај и да останат запаметени по својот избор на совршен фустан.
Креациите во кои што ќе прошетаат на црвениот тепих преку ноќ стануваат едни од најпродаваните, а оние кои ќе си дозволат модна грешка ризикуваат да станат постојана мета за модните критичари.
За среќа 87- доделување на престижната филмска награда помина без екстремниот избор на облека. Се разбира ако тука ја изземеме Лејди Гага која го негува својот ексцентричен стил.
Судејќи по изборот на фустани кои што можеше да се видат на црвениот тепих, Холивуд полека, но сигурно излегува од клишето на една боја или подобро кажано доминација на една иста нијанса на фустани. Овој пат дамите беа похрабри во однос на изборот, па беше тешко да се пронајдат креации кои наликуваат една на друга.
Долгата коса отсекогаш била симбол на женственоста, но Скарлет Јохансон, Кејт Бланшет и Лупита Нионг покажаа дека и краткиот стил е подеднакво секси особено кога се комбинира со впечатлив накит.
Истото важи и за правилото „не носи црвено на црвено“.
Роземунд Пајк и Дакота Џонсон ја избраа токму оваа боја и наместо да се „слеат“ во цревниот тепих изгледаа совршено неодоливо.
Епитетот најслатка на вечерта несомнено и припадна на бремената Кира Најтли која го прекри своето трудничко стомаче со прекрасен цветен фустан од колекција на Valentino.