Ако без клима уред не може да се издржат високите температури, лекарите советуваат дека не е убаво и претерано да се користи, особено ако доаѓа до огромна температурна разлика со надворешната, која не би требало да биде поголема од осум степени.
Освен температурниот шок во случај на брзо преминување од врелиот асфалт во климатизирана просторија и обратно, најголема опасност по здравјето им се заканува на оние кои имаат срцеви проблеми. Тие може да доживеат ангинозен напад, па дури и инфаркт.
- Секоја брза промена на температурата, кога разликата меѓу внатрешната и надворешната температура ја надминува разликата од 10 степени, предизвикува температурен шок во организмот. Крвните садови не можат така брзо да се собираат и шират, а воедно и да воспостават нормална циркулација. Тоа предизвикува преоптеретување на срцето и сите крвни садови, па доаѓа до гушење, притисок на градниот кош, срцето и желудникот со болки кои се шират накај рамената, односно доаѓа до прединфарктна состојба, смета д-р Јелена Стојаковиќ, општ лекар во Белград.
Ова може да им се случи не само на личностите со срцеви проблеми туку и на релативно здравите и млади луѓе. Особено е ризично кога од климатизираните трговски центри или работни простории, каде што дневно се поминува и по неколку часа, наеднаш излезете на топол воздух каде што температурата понекогаш преминува и над 40°С. Подеднакво е опасно и ако седете директно под клима, односно на местото каде што ладниот воздух дува директно во вас.
- Тоа може да предизвика главоболки и болки во коските и зглобовите, а типичен пример се возачите на климатизираните автомобили, кои најмногу се жалат на болки во десното рамо, затоа што токму таму дува ладниот воздух, додава д-р Стојаковиќ.
Ладниот воздух никогаш не смее да биде вперен во вратот, рамената, грбот поради опасности од ишијас и вкочанетост. Треба да го чувате и лицето за да не дојде до парализа на нервите на лицето, односно фацијален грч.