Ова навистина звучи како новост од соништата за пушачите кои не сакаат повеќе да му го нанесуваат тоа „слатко зло“ на својот организам!
Доколку сакате да се ослободите од вашата зависност од цигари и да ја оставите таа лоша навика зад себе, тоа може да го направите за време на спиењето, со помош на специјалната „смрдлива“ ароматерапија.
Имено, во новиот научен експеримет, 66-те испитаници во спалната соба биле изложени на чад од цигари. Но, тој добро познат никотински мирис, во втората фаза од сонот бил проследен и со други непријатни миризби, како онаа на расипана риба или расипани јајца.
Како што тврдат израелските истражувачи, на чело со д-р Анат Арзи, оваа метода влијае врз потсвеста на пушачите. И тоа, како што се чини, многу успешно.
Имено, испитаниците веќе следниот ден во просек испушиле 48% помалку цигари, а ефектот траел дури и една седмица по завршувањето на сесијата, кога пушеле барем 34% помалку.
За жал, оваа своевидна „смрдлива ароматерапија“, не функционира кога пушачите се будни. Затоа, оваа метода е проблематична за практикување. Доколку сакате да го испробате овој начин за да се откажете од цигарите, мора да имате покрај себе некој кој 10 минути откако ќе потонете во сон, па на секои 90 минути, да запали цигара и под носот да ви стави некоја дополнителна неподнослива миризба.