Сигурно сте ја слушнале изреката „ти си она што јадеш“ и сте се запрашале дали има вистина во тоа. Дека здравјето доаѓа преку устата е научно докажано, а доколку сте бремени или доите, треба да обрнувате уште поголемо внимание на она што го внесувате!
Колку е важна исхраната во бременоста и за време на периодот на доење знае секоја мајка, но за здравјето на самата мајка, но и на бебето, не е доволно само внесување на таблети со фолна киселина и други клучни минерали и витамини за кои телото има зголемена потреба во овој период. Важно е и да се исхранувате здраво.
Сепак, факт е дека многу бремени жени имаат зголемен апетит, но и желба за одредени намирници. Мислејќи дека не е важно колку ќе се здебелат за време на бременоста, тие не само што повеќе јадат, туку и си дозволуваат поголеми „гревови“, како што е уживањето во брзата храна.
Токму затоа, бразилското Здружение на педијатрите „Rio Grande“ објави вознемирувачка кампања во која ги предупредува идните мајки за ефектите на брзата храна и засладените газирани напитоци кои ги погодуваат нивните новороденчиња.
Во ракмите на кампањата објавени се слики од бебиња кои цицаат гради во облик на нездрави намирници, како крофна, хамбургер и газиран сок.
„Вашето дете е она што го јадете“ е слоганот на кампањата која ја дизајнирала маркетинг агенцијата Paim, а чија цел е да ги предупреди мајките на тоа дека можат да им наштетат на нивните деца со диетите или нездравите оброци.
- Вашите навики во првите три години од животот на детето може да го спречи развојот на сериозни болести кај него, препорачуваат од здружението.
Директниот поттик за создавање на оваа кампања се резултатите од истражувањето кое покажало дека нездравите оброци може да влијаат на развојот на рак кај децата во подоцнежна доба.