Дебелината се вбројува во најопасните фактори за здравјето, бидејќи вклучува проблеми со зглобовите, голем ризик од срцев и мозочен удар, како и прерана смрт.
Иако вежбањето е клучно за намалување на тежината, сепак истото носи одредени ризици кога се во прашање луѓето со прекумерна тежина. Но, ова не значи дека тие не смеат да вежбаат, туку пред да започнат со редовна физичка активност, треба да се консултираат со лекар, со цел да се потврди дека се доволно здрави за вежбање, како и да се утврдат одредени мерки на претпазливост.
Еве со какви проблеми можат да се соочат луѓето со прекумерна тежина при вежбање:
Срцев застој
Кардио вежбите го зголемуваат пулсот и го вежбаат срцевиот мускул, кој со време треба да зајакне. Меѓутоа, ако срцевиот ритам стане премногу висок, кардио тренингот може да предизвика инфаркт, а срцевите застои да предизвикаат аритмија и мозочен удар.
Иако секој може да има срцеви застои додека вежба, кај дебелите луѓе ризикот е поголем. Тие обично имаат повисок крвен притисок, послабо срце и лоша циркулација, што влијае на зголемување на ризикот за срцев застој.
Прашајте го вашиот лекар до колку најмногу ви е дозволено да го зголемите пулсот за време на физички вежби. За многу од луѓето, пулсот треба да биде 220 минус вашите години, но сепак ова може да варира во зависност од степенот на дебелина и целокупното здравје.
Респираторни проблеми
Вежбањето бара да дишете забрзано, а луѓето кои не се навикнати на физичка активност може да го изгубат здивот. Срцевите проблеми, како што се високиот крвен притисок или слабата циркулација - за кои имаат склоност дебелите луѓе – може исто така да го направи дишењето многу тешко.
Доколку имате потешкотии при дишењето, забавете со физичката активност и настојувајте да дишете бавно и длабоко. Или исправете се или шетајте во место. Исто така, не заборавајте да се напиете вода.
Повреда на зглобовите
Зголемената тежина носи дополнителен притисок врз зглобовите, а дебелите луѓе страдаат од таквите проблеми, вклучувајќи го и артритисот.
Одредени вежби, како што е трчањето, се и онака стресни за зглобовите. Во некои екстремни случаи, притисокот врз зглобовите може да доведе до нивно кршење или до повреда на мускулите или лигаментите, а може и да се влошат старите повреди.
Проблеми со кожата
Вежбањето предизвикува нагли движења на вашето тело. Кај подебелите луѓе, ова може да предизвика триење на кожата и нејзино иритирање. Потењето, пак, може дополнително да го иритира ова триење, што може да доведе до рани и габични инфекции.
Со цел да ги спречите инфекциите, носете облека за вежбање дизајнирана да ја впива потта. Исто така, од помош ќе ви биде нанесувањето на талк пудра на проблематичните области, која може да го намали триењето и вежбањето да биде поудобно.