Со доаѓањето на летото пристигнаа и високите температури. Најчестите препораки од медицинските лица за избегнување на топлотните удари и сончаница се: да не се биде на отворено од 10 до 17 часот, носење на лесна памучна облека со светли бои, пиење многу вода, јадење на лесна храна и покривање на главата со шапки.
Но, кои се најчестите прашања поставувани во врска со високите температури и ризикот од топлотен удар?
1. Што се случува со телото додека е изложено на високи температури?
При високи температури, телото се лади на природен начин преку потење. Но, кога потењето не е доволно, температурата на телото се зголемува над 37 степени и може да се појават грчеви и дехидрацијата како последица на потењето. Особено е важно да се напомене дека во местата со висока влажност, телото побавно се поти и со тоа побавно ја исфрла топлината од организмот.
2. Кои се знаците на топлотен удар?
- Висока телесна температура (над 38 степени Целзиусови)
- Црвена, сува и вжештена кожа на допир
- Забрзан пулс
- Вртоглавица
- Нагон за повраќање
- Конфузија
- Грчеви во мускулите
- Блед тен
3. Што треба да се превземе за да се помогне на лицето кое има топлотен удар?
За почеток тргнете го од сонцето и однесете го некаде каде што има сенка или поладна околина. Дајте му да се напие ладен пијалак (по можност вода). Лицето треба да се истушира со што поладна вода и да се пресоблече во лесна памучна облека. Потоа следи одмор во ладна атмосфера и лесен оброк кој нема да содржи алкохол или мрсно месо... По можност во оброкот да има и сезонско овошје.
4. Колку течности треба да се пијат додека траат високите температури?
Што е можно повеќе. И тоа не само сокови, туку најмногу ладна вода. Избегнувајте ги газираните пијалоци бидејќи содржат кофеин. Исто така не чекајте да бидете жедни за да се напиете вода додека траат високите температури. Пијте 1-2 чаши вода на секој половина час.