Американската Агенција за храна и лекови соопшти дека не е здраво да се јаде сирова смеса за колачи дури и кога правите според рецепт без јајца. Всушност, не е здраво да се јаде сирово брашно во било кој облик. Пред сè се мисли на тестото за колачи, односно лижење на лажичката со која се прави тестото.
Сировите јајца се носители на салмонела, но се покажало дека брашното може да биде преносител на бактеријата Ешерихија коли. Симптомите на Ешерихија коли вклучуваат крвава столица и грчеви во стомакот. Иако повеќето луѓе се опоравуваат за недела дена, бактеријата може да предизвика откажување на бубрезите особено кај деца помали од 5 години.
- Брашното е дериват добиен од зрна кое доаѓа директно од полето и обично не се третира за да се убијат бактериите, изјавил Лесли Смут, виш советник во Агенцијата за храна и лекови во САД.
Од таму соопштија дека животинскиот отпад може да контаминира зрна од кои се добива брашно, а преку готвењето, печењето или пржењето се убиваат сите бактерии. Затоа, со цел да ја избегнете заразата, немојте да јадете или да пробувате сирово тесто за колачи, туку почекајте прво да се испече.