Кога доаѓа до воспаление на увото, треба да разликувате три вида на воспаленија: воспаление на надворешното, на средното и на внатрешното уво. Сепак, најчесто доаѓа до воспаление на средното уво.
Увото, грлото и носот се поврзани органи, па воспалението на увото ретко се јавува како посебна појава. Најчесто се јавува во склоп на респираторните инфекции на носот и грлото, бидејќи воспалението од носот продира во увото преку Евстахиевата туба, односно делот кој што го спојува носот и средното уво.
- Воспалението на ушите е почесто кај малите деца поради специфичните анатомски структури, односно пократката Евстахиева туба, недоволно развиениот имунолошки систем и хипертрофијата на лимфното ткиво. На тоа особено се изложени децата во градинка, поради поголемите респираторни инфекции кај повеќето деца, објаснува д-р Ива Палиќ, специјалист педијатар во приватна клинка во Хрватска.
Најчести симптоми се болка во увото и зголемена телесна температура. За точна дијагноза, потребен е клинички преглед и анамнеза од родителите. Честите анамнестички податоци од родителите се дека детето било настинато неколку денови, дека му течел носот и се разбудило со болки во увото.
Воспалението најчесто се јавува во склоп на вирусна инфекција на горните дишни патишта. Кога се работи за вирусна инфекција, не е потребен антибиотик при лекувањето, а самиот тек на лекување обично подразбира употреба на лекови против болка како што се парацетамол и ибупрофен.
Кога е потребно да се обратите на лекар?
Кога се работи за здравјето на децата, секогаш пристапуваме со поголема грижа и внимание, отколку кога се работи за нашето здравје. Воспалението на увото не е безизлезна состојба и веднаш штом детето се пожали на болка, добро е да се однесе на лекар, бидејќи некогаш можеби се работи и за бактериско воспаление.
- Бактериското воспаление на уво се лекува со антибиотици. Најчесто, матичниот лекар го упатува детето на ОРЛ специјалист, за да ја открие вистинската дијагноза и да препише потребна терапија, додава д-р Палиќ.
Таа советува редовно да се празни носот на децата, бидејќи токму тој е најголемата причина за воспаленијата.