Секој тип на холестерол не е ист и доаѓа во здрава и нездрава форма. Се смета дека лошиот холестерол (LDL), кој докторите сугерираат да не се консумира често, го има во црвените меса и пржената храна, додека добриот (HDL), го елиминира LDL кој се таложи на ѕидовите на крвните садови и го зголемува ризикот од срцев удар. Ако даваме заклучок според тоа, зголемувањето на нивото на HDL го заштитува срцето од оштетување.
Тоа е така во теорија, меѓутоа студии кои ги набљудуваат нивоата на HDL и ги поврзуваат со настани поврзани со срцеви заболувања не секогаш покажуваат дека поголемо ниво на HDL значи и помал ризик од болест, а научниците сега можеби конечно знаат зошто е тоа така.
Во најнова студија која опфаќала 300 луѓе со висок ризик од срцеви заболувања, истражувачите заклучиле дека само високи нивоа на HDL не се доволни да го одржат срцето здраво, но медитеранската диета му помага на овој тип на холестерол да работи многу поефикасно.
Во студијата која траела една година, на случајно одбрани поединци им била давана исхрана која се состоела или од малку масти со малку црвено месо и многу овошје и зеленчук или од две верзии на медитеранската диета: една збогатена со маслиново масло и друга со ореви. По една година, истражувачите ги споредиле нивоата на холестерол во крвта кај партиципантите во однос на нивните почетни нивоа и откриле дека само оние кои се хранеле со немасната немедитеранска исхрана ги намалиле тоталните, како и нивоата на LDL холестеролот, но оние кои се хранеле со медитеранската исхрана имале подобро функционирачки HDL холестерол.
Најголемо подобрување во HDL функцијата покажала групата која внесувала поголема количина на маслиново масло – нивниот HDL холестерол бил поспособен да го отстранува LDL холестеролот од крвните садови и да го пренесува во црниот дроб за отстранување, а и подобро функционирал како антиоксиданс, заштитувајќи го организмот од штети предизвикани од воспалувања кои можат да ги ослабат крвните садови и да ги направат повеќе подложни за собирање наслаги кои можат да предизвикаат срцев удар. Нивниот HDL исто така имал подобра способност да ги одржува крвните садови еластични и лесно свитливи.
Важно е да се наспомене дека ниеден од трите режима на исхрана значително не ги зголемил нивоата на HDL, а исто така научниците од компаниите кои произведуваат лекови сè уште немаат пронајдено лек кој ги зголемува овие нивоа.
Според најновиве резултати, поверојатно е дека тие ќе треба да се фокусираат не на зголемувањето на нивото на HDL, туку на максимално оптимизирање на неговата функција – нешто што маслиновото масло го прави природно.