Кефирот е ферментиран млечен пијалак кој има вкус сличен на јогуртот, но има потенка текстура и е по питок. Toј настанува со мешање на козјо, овчо или кравјо млеко со кефирна габа која за неколку дена го ферментира.
Може да се пие без ништо, да се додава во смутија, а може да се меша и со мед, темно чоколадо и сл.
Зошто кефирот одеднаш е „ѕвезда“ на сцената за здрава исхрана? Овој пијалак е потентен извор на пробиотици – живите бактерии кои го одржуваат нашиот дигестивен систем. Иако нашите црева веќе содржат билиони бактерии, пробиотиците кои ги консумираме од здрави извори како кефирот го одржуваат нивниот баланс во телото.
Покрај тоа, со консумирање на ферментирана храна како јогурт, кисела зелка, или кефир, му помагаме на имунолошкиот систем да се зајакне, а разни истражувања покажале дека пробиотиците исто така влијаат и на нашата емоционална добросостојба, бидејќи бактериите во стомакот можат да влијаат на мозокот и емоциите.
Одредени истражувачи анализирале MRI скенови од доброволци, и било пронајдена конекција помеѓу региони во мозокот и доминантни бактерии во цревата, сугерирајќи дека мешавината од микробите може да помогне во одредување на типот на мозокот, како и на начинот на развивање на мозочните кола.
Други, пак, откриле дека замената на цревните бактерии кај анксиозни глувци со бактерии од „бестрашни“ глувци, им помогнале на оние од првата група да се помалку анксиозни и повеќе социјални.