Доколку сакате дневните тренинзи да ги направите поинтересни, додадете го боксот во вашата програма бидејќи тој е совршена комбинација од забава и фитнес, еве и зошто:
1) Ве тера да го користите секој дел од телото
Штом научите како да боксувате со правилна форма, добивате вежба за целото тело, бидејќи со него се вежбаат нозете, торзото, рацете, колковите, грбот и рамениците.
2) Ефективен е за согорување калории
Според процените, со боксување (во ринг) можат да се согорат до 800 калории на час – многу повеќе од било кој друг спорт. Удирање на вреќа половина час согорува 200 калории, додека 30-минутен спаринг со партнер согорува околу 300.
3) Ја подобрува координацијата помеѓу очите и рацете
Боксот вклучува многу фокусирање, процесирање на она што го гледаме и адаптирање на нашите движења според тоа, што вклучува повеќе различни делови од мозокот да работат одеднаш. Ова е причината што многу пациенти дијагностицирани со Паркинсоновата болест го користат боксот за да се справат со симптомите.
4) Една е од најдобрите вежби за ослободување од стрес
Неколку студии покажале дека боксувањето може да го подобри расположението, бидејќи мозокот ја зголемува продукцијата на ендорфини – невротрансмитери кои ги креираат позитивните мисли.
Ефектите од ослободување на стрес не се ограничени само на мозокот, бидејќи овој спорт помага и во ослободување на мускулната тензија која е резултат на стресот.