Многу студии покажале дека физичката активност е поврзана со намален ризик од развивање на депресија, но дали таа може и да ја спречи?
Нова студија користела генетички податоци од повеќе од 600 000 возрасни личности вклучени во разни студии за геномна асоцијација и било откриено дека физичката активност игра важна улога во редуцирањето на ризикот од депресијата.
Студијата анализирала разни мерки – геномите на луѓето, нивните медицински истории за депресија и симптоми на депресија и колку физичка активност имала секоја личност (мерена со фитнес тракери и сопствени тврдења). Споредувајќи ги овие информации, биле идентификувани неколку варијанти на гени кои се поврзани со веројатноста некој да вежба, како и гени асоцирани со веројатноста некој да развие депресија.
Оние кои имале генетски маркери поврзани со поголема веројатност за вежбање имале помали шанси да развијат депресија, но оние со маркери за депресија немале помали шанси за вежбање, туку токму спротивното – што сугерира дека вежбањето може да заштити од депресија, но депресијата не секогаш предизвикува некој да вежба помалку.
Вежбањето не е лек за проблемите поврзани со менталното здравје, а депресијата може да биде пречка за имањето на доволно физичка активност. Иако вежбањето не е совршено решение за депресијата, разни студии покажале дека дефинитивно може да направи разлика, особено тренингот со отпор, како што е тежинскиот тренинг.
Други студии, пак, покажале дека било каков вид на вежбање (од кардио до јога) може да ги намали депресивните симптоми.
Сè уште не е јасно како со вежбањето се постигнуваат овие ефекти, но истражувачите имаат неколку теории. Ригорозните вежби како што се тежинските тренинзи и трчањето го зголемуваат дотокот на крв во мозокот, потенцијално менувајќи му ја структурата и клеточниот состав.
Вежбањето активира и ослободување на ендорфини, побарува контрола на дишењето и многу други работи корисни за психофизичкото здравје.
Истражувањата покажуваат дека дури и кратка физичка активност може да го подобри физичкото и ментално здравје – без разлика дали се работи за 15-тина минути или повеќе.
Користејќи податоци од повеќе од 1.2 милиони возрасни личности во САД, голема студија од 2018-та открила дека подобро ментално здравје се постигнува со минимум 2 часа вежбање неделно (во просек 20 минути дневно), додека пак студија од 2017-та вели дека само еден час физичка активност неделно може да е доволна за превенција од депресија.