Алергијата, чувствителноста и нетолеранцијата на храна не се ист вид на реакција и се појавуваат поради различни причини.
Што е алергија на храна?
Кога станува збор за алергијата на храна, имунолошкиот систем кој вообичаено се бори против инфекции ја гледа храната како „натрапник“, што доведува до имунолошка реакција во телото при што се ослободуваат хемикалии како хистаминот, што предизвикува симптоми како што се проблеми со дишењето, стеснување и оток на грлото, кашлање и црвенило на кожата, меѓу другите.
Алергиите на храна се сериозни и може да предизвикаат симптоми опасни по живот, така да треба да се внимава никогаш да не се јаде било што содржи макар и мал дел од храната на која што сте алергични.
Што е чувствителност на храна?
Чувствителноста на храна е неалергиска инфламаторна имунолошка реакција на телото која може да доведе до разни симптоми како умор, егзема, главоболки, болки во зглобовите, депресија, задршка на вода во организмот што доведува до дуење и сл.
Што е нетолеранција на храна?
За разлика од алергијата или чувствителноста, нетолеранцијата не е активирана од имунолошкиот систем.
На пример, личност која е нетолерантна на лактоза го нема ензимот потребен за природно разградување на шеќерот во млекото. Така, несварениот шеќер е нападнат од бактериите во стомакот, што креира гасови и создава подуеност, а често пати и дијареја. Во суштина, нетолеранцијата на одредена храна е неспособноста на организмот правилно да ја разгради односно свари и процесира.
Постојат неколку тестови да се одреди дали некој има алергија, чувствителност или нетолеранција на храна. Вообичаено тие вклучуваат неколку вида на тестови на крв, но алерголог најдобро може да каже каков тест треба да се направи, во зависност од симптомите.