Ледено студена Кока-Кола во лето ни дава прекрасно чувство, но таква доза на шеќер остава последици на телото.
Во првите 10 до 15 минути по пиењето, преку цревата тој шеќер навлегува во крвта, кревајќи го нивото на гликоза – шеќерот во крвта. За да се справат со толкавата количина на енергија, повеќе органи во телото почнуваат засилено да работат за да го процесираат шеќерот. Панкреасот испушта инсулин кој помага за транспортирање на шеќерот до мускулите за енергија, но една лименка содржи многу повеќе шеќер (т.е јаглехидрати) отколку што им е потребно на мускулите.
Пола литар газиран пијалак содржи јаглехидрати колку што ги има во еден просечен оброк, а во најголем број на случаи таквите пијалаци се консумираат покрај оброкот. Така, овој дополнителен шеќер наместо да се складира во мускулното ткиво, во црниот дроб се конвертира во маснотии.
За да телото се ослободи од вишокот на шеќери и бубрезите работат засилено што значи дека телото губи вода, која заедно со диуретскиот ефект на кофеинот од пијалакот го зголемува ризикот од дехидрација.
Добрата вест е тоа што не мора целосно да ги исфрлите вакви пијалаци. Најважното е да се запомни важноста на контрола на порциите. Повремено пиење на газирани пијалаци нема да предизвика значајно негативно влијание на вашето здравје. Сепак, доколку ви премине во навика тогаш може да имате проблеми.