Зголемената појава на тип 2 дијабетесот значи и зголемен потенцијал за развивање на сериозни здравствени компликации, од срцеви заболувања до мозочни удари, губење на видот и прерана смрт, а „противотровот„ за ова би можело да е вежбањето.
Неколку студии покажале дека вежбањето може да ја спречи или одложи појавата на тип 2 дијабетесот за 58% кај популацијата со висок ризик. Студија од 2018-та го објаснува потенцијалното влијание на тежинскиот тренинг и тренинзите за сила врз ризикот од ова заболување, чии податоци покажале дека градењето на мускулна маса/сила е поврзано со 32% намалување на ризикот од него.
Ваквите тренинзи помагаат за подобрување на нивото на глукоза преку зголемување на мускулната маса и редуцирање на обемот на половината, што е поврзано со инсулинската резистентност. Дури и едноставни и краткотрајни вежби како „чучњевите“ (squats) влијаат за подобрување на здравјето, иако со нив не се слабее.
За потребите на новата студија, истражувачите следеле повеќе од 35 000 здрави жени во период од 14 години и откриле дека оние чија фитнес програма вклучувала и тежински тренинг имале 30% помал ризик од тип 2 дијабетес во споредба со жените кои претежно правеле кардиоваскуларни вежби. Исто така било заклучено дека комбинацијата од тежински и кардио тренинг имала најголемо влијание во намалување на ризикот од болеста.