Донацијата на крв е можеби најхуманата и најнесебичната работа што можеме да ја направиме, со оглед на тоа што здравата крв спасува живот и го подобрува здравјето. Во светот од година во година се зголемува бројот на дарители на крв, што е одлична вест. Доколку се колебате дали да го направите тоа или не, треба да имате на ум дека овој хуман гест не претставува закана за вашето здравје и воопшто нема да ви наштети.
Еве за кои луѓе вашата крв има непроценлива вредност:
- Жените кои имаат компликации за време на бременоста, како што е вонматерична бременост, обилно креварење пред или за време на породувањето.
- Децата кои патат од анемија, која често се јавува како последица на несоодветна исхрана.
- Лицата кои доживеале тешки телесни повреди
- Лицата кои биле подложени на оперативни зафати.
- Лицата кои патат од рак.
Потребата за здрава крв е константна бидејќи истата може да се искористи само на одредено време. Затоа, честата донација на здрава крв е неизмерно потребна за да може да биде достапна во секое време.
Крвта е најдрагоцениот подарок кој една личност може да и’ го даде на друга. Тоа значи да подарите живот. Одлуката да донирате крв може да спаси нечиј живот или животот на повеќемина, бидејќи крвта може да се раздвои на нејзините компоненти – црвени крвни зрнца, плазма или тромбоцити. Овие компоненти може да се користат и посебно, за лечење на одредени заболувања.