Денот е долг, особено ако ви е исполнет со безброј обврски по кои сакате да се одморете. И наместо да се фаќате за работа веднаш откако ќе пристигнете дома, обидете се да се одморите барем 20 минути. Дремката е една навика, која е мошне здрава и која влијае врз нашите функции.
Дури и кога гледате филм или завршувате некој проект доцна во ноќта, дремката ќе ви помогне да се почувствувате одморено и вие ќе можете полесно да ја завршите обврската. Некои големи компании дури им дозволуваат на вработените да дремнат неколку минути за време на работа. Едни од тие компании се Google и Apple, додека кај нас сè уште не е воведена оваа „корисна дисциплина“. Но, секој вработен би сакал шеф кој ќе му дозволи да дремне, а не да му виси над глава за да ја заврши работата. Дремката ја подобрува продуктивноста и свеста.
Едно истражување од универзитетот во Колорадо откри дека децата кои не дремнуваат преку ден се нервозни, не се весели и губат интерес во извршувањето на обврските. Истото ова може да се забележи и кај возрасните. Научниците открија дека еден час дремка може драматично да ја зголеми способноста за учење и помнење. На некој начин, дремката го освежува мозокот.
Но, колку време треба да трае дремката?
Експертите велат дека од 10 до 20 минути дремка е најдобро за освежување на вашиот мозок и зголемување на енергијата. При дремката не потонуваме во сон како при спиењето, што ви овозможува веднаш да почнеме да функционираме.
Дремка со времетраење од 30 минути може да ви предизвика поспаност бидејќи се будите во периодот кога телото влегува во длабок сон. Истото ова чувство ќе го почувствувате при дремка од 60 минути, но 60-минутните дремки се добри за подобрување на меморијата.
Подолгите дремки во период од 90 минути се добри само за оние кои не спијат доволно во текот на ноќта. Ова е еден комплетен циклус кој може да ја подобри емоционалната меморија и креативност.
Дремките се навистина добри за вас – физички и ментално. Но, немојте да претерате со нив. Дремнете малку за да можете и навечер да се наспиете доволно за нормално да функционирате наредниот ден.