Жените кои консумираат помалку од два овошни оброци на ден се изложени на поголем ризик за развој на депресија, утврдиле научниците од австралискиот Универзитет Квинсленд.
Резултатите од шестгодишното истражување спроведено врз шест илјади жени во Австралија, откриле јасна поврзаност помеѓу внесот на овошје и појавата на симптомите на депресија.
- Утврдивме дека жените кои јадат најмалку два овошни оброци на ден имаат помала веројатност да патат од депресија во однос на жените кои внесувале помалку овошје, дури и откако ги земавме во предвид другите фактори, како пушење алкохол, индекс на телесна маса, телесни активности, брачен статус и образование. Откривме и дека консумирањето на најмалку два овошни оброци на ден штити од развој на депресија во иднина, изјавила Гита Мишра од Заводот за јавно здравство при Универзитетот.
Научниците не утврдиле таква поврзаност помеѓу консумацијата на зеленчук и депресијата.
Заштитното влијание на овошјето го објаснуваат со поголемата концентрација на антиоксиданси и противвоспалителни состојки, како што е ресвератролот, кој го нема во зелечнукот.
Инаку, од депресија жените патат двојно почесто во однос на мажите, додека случаите на заболување од депресија, на генерално ниво, се во пораст.