Киноата е древна јужноамериканска билка, која ја нарекуваат мајка на житарките. Уште пред 5000 години истата се одгледувала на подрачјето на Перу, Чиле и Аргентина, каде заедно со пченката, биле две основни прехранбени намирници во царството на Инките.
Иако киноата се смета за житарка, таа всушност е псевдожитарка, сродна на цвеклото и на спанаќот. Нејзините листови имаат вредност како зелениот листест зеленчук и можат да се јадат како, на пример, блитвата. Киноата содржи високо ниво на белковини и се смета за добар извор на есенцијални аминокиселини.
Аминокиселината лизин, која инаку не е вообичаена за житарките, овозможува раст и регенерација на ткивата. Омега 3 и омега 6 масните киселини можат да спречат срцеви заболувања и болести на крвните садови.
За антиоксидативните својства на оваа намирница заслужно е високото ниво на витамин Е, покрај минералите манган и бакар.
Магнезиумот и рибофлавинот (витамин Б2) помагаат во борба против мигрената. Покрај витаминот Б2, киноата содржи и голем дел од останатите Б витамини, а одличен извор е и на фосфор, калиум и цинк.
Не е препорачливо подолго време да ја држите покисната во вода бидејќи горчливата материја може да продре во внатрешноста на зрното. За време на варењето, соодносот на вода и киноа може да биде дури 5:1, бидејќи оваа житарка силно ја впива водата и го зголемува својот обем.
Богатство за здравјето
Киноата е исклучително богата со железо и задоволува голем дел од препорачаниот внес на овој минерал.
Оваа житарка е идеална за регулирање на варењето, бидејќи содржи многу нерастворливи влакна кои го подобруваат празнењето на цревата и штитат од болести на дебелото црево.
Растворливите влакна го намалуваат ризикот од појава на камен во жолчката, ги намалуваат триглицеридите и штитат од рак на дојките, желудникот и цревата. Со редовна консумација на интегралните житарки се намалува и ризикот од појава на дијабетес тип 2.
Не содржи глутен
Киноата не содржи глутен и не предизвикува алергиски реакции, па заради тоа е погодна за исхрана и на оние кои патат од алергии, а може да се користи и за дохранување на доенчиња. Имено, за деца постари од 7 месеци, може да се направи каша од киноа.
Заради високопротеинскиот состав, киноата претставува здрава замена за месото и би требало да биде неизоставен дел од вегетаријанската исхрана.