Кучето Френки, од расата германски овчар, може да надушка рак на штитната жлезда кај луѓе кај кои таквата дијагноза се уште не е ни поставена, објавиле американските научници на годинешниот состанок на Американското здружение за ендокринологија, пренесува BBC.
Тестот врз 34 пациенти покажал дека Френки во 88 проценти од случаите не греши при детектирањето на ракот.
Германскиот овчар во вкупно 30 од 34 случаи успеал со душкање на урината на пациентите да ги открие оние кои имале рак на штитната жлезда. Тој бил истрениран да легне кога ќе надушка рак, а да ја сврти главата од здравата урина.
Инаку, кучињата имаат за десет пати повеќе рецептори за мирис од човекот. Научниците велат дека откривањето на материите кои им овозможуваат на кучињата да го детектираат туморот би можело да доведе до нов облик на неинвазивно дијагностицирање на болеста.
Во претходните истражувања се воспоставило дека кучињата може да надушкаат и рак на белите дробови и цревата.