Резултатите од истражувањето спроведено на Универзитетот во Канзас, покажале дека најзаразните предмети кои можат да се најдат во кујната се кујнските крпи и мобилниот телефон.
Најголемата причина што овие предмети претставуваат вистински магнет за бактерии и други микроорганизми е тоа што луѓето имаат навика кујнските крпи да ги фаќаат пред да ги измијат рацете, го допираат и мобилниот телефон за време на подготовката на оброците или претходно го контаминираат со употреба во тоалетот.
Уште едно истражување на истиот универзитет покажало дека на мобилниот телефон најчесто се наоѓаат десет пати повеќе бактерии отколку на капакот од тоалетната шолја.
Уште еден голем извор на потенцијална зараза претставуваат и хартиените крпи кои луѓето ги допираат дури и кога не ги користат за сушење.
Во САД од труење со храна секоја година заболуваат околу 48 милиони Американци, додека во Велика Британија се регистрираат околу 500.000 случаи годишно.
Труењето најчесто е предизвикано од салмонела. Научниците утврдиле дека салмонелата продолжува да се размножува на крпите и сунѓерите дури и кога се испрани во лавабото.
Истражувањето е објавено во списанието „Food Protection Trends“.