И покрај добро познатиот факт дека солариумот може да предизвика рак на кожата, голем број на луѓе и понатаму на овој начин го добиваат својот вештачки тен. За страшните оштетувања на кожата предизвикани од солариум веќе зборувавме. Но, доколку опасноста од рак не успева да ве одврати од одење на солариум, можеби опасноста од следниве зарази ќе успее.
Имено, дерматологот Даун Мари Дејвис, од клиниката Мајо, вели дека бактериите и вирусите може да преживеат во солариумот и покрај големата топлина.
- Сите на кожата имаме бактерии кои ги пренесуваме и на нашите кревети. Иако ги грееме со своето тело, тоа не е доволно да се убијат, а тие стануваат посилни и поотпорни. Доколку се потите, тоа само им придонесува на вирусите и бактериите повеќе да се размножуваат. Доколку имате било какво оштетување на кожата или исекотина, што не е реткост, многу е поголема веројатноста дека ќе се здобиете со инфекција за време на третманот со солариум, вели Дејвис.
Таа напоменува дека стафилококата, бактерија која може да предизвика инфекција на кожата, фекални бактерии, вирусот на херпес и полови брадавици кои доведуваат до заразување со ХПВ, можат да ја издржат топлината во солариумот и да преживеат.
Тие вируси и бактерии потоа може да се пренесат и на други личности кои имаат минијатурни оштетувања на кожата, за кои не се ни свесни.
- Ултравиолетовата светлина теоретски може да ги убие бактериите, но во солариумот истата не е доволно силна за да ги уништи, предупредува Дејвис.