Како организација која, меѓу другото, се залага за промоција на професионално новинарство и почитување на етичките норми во професијата, силно го осудуваме однесувањето на новинарите во емисијата „Бисери“, наведува во денешното соопштение испратено до медиумите Асоцијацијата на студенти по новинарство, ФЕЈС Македонија.

ФЕЈС Македонија смета дека новинарот, имајќи општествено угледна професија со огромна морална одговорност, треба да има изострено чувство за почит кон соговорникот.

Асоцијацијата на студентите по новинарство со жалење констатира дека однесувањето на одредени новинари, земајќи го како пример Зоран Божиновски, не кореспондираа со основните етички принципи во оваа професија и претставуваат недостаток на елементарна комуникациска култура.

ФЕЈС Македонија, исто така, смета дека изостанувањето на реакција од страна на колегите-новинари, а пред се реакција од водителката Анета Кочишки, може да се толкува како оправдување на недостојните коментари, односно се вклопија во сивилото на професијата.

Во знак на покажување почит кон ликот и делото на Тоше Проески и неговото семејство,  потребно е јавно извинување кон семејството и македонската јавност од името на новинарите учесници во емисијата, се додава во соопштението на ФЕЈС Македонија.