Медиумите ширум Балканот ја пренесуваа ексклузивната приказна на Прес со последните снимки од Тоше Проески кои ги снимила Андријана Будимир. Но одеднаш ја снема приказната од страницата на овој српски таблоид, а за снимките се покажа дека се исечоци од видеото снимено додека Тоше гостувал во Бугарија во 2006 година.

Првата снимка се вика "мое бебенце" и го покажува Тоше како лежи на креветот, додека на другата седи во автомобил и праќа бакнеж кон камерата на мобилниот телефон. "Втората снимка е направена во автомобил, и изгледа прилично симболично, бидејќи Тоше се свртува и директно во камерата на мобилниот телефон праќа бакнеж. Својот последен бакнеж" рекол неименуван извор на Прес, кој сега и не е чудно зошто сакал да остане анонимен.

И двете снимки според првичните информации ги снимила Андријана, а ги објавила за да докаже дека изјавите на менаџерката Љиљана Петровиќ "Тоше и Андријана не се во врска" се лажни. Сепак единствено што сега е лажно е автентичноста на снимките кои Андријана наводно ги снимила со мобилниот.

Изворот на Прес, кој се покажа како непроверен, ги отстапил снимките на овој српски таблоид и рекол дека "се снимени непосредно пред Тоше да тргне на пат во Словенија и Хрватска кој трагично се заврши".