Атина, 6 јули 2015 (МИА) - Грчкиот министер за финансии Јанис Варуфакис поднесе оставка, информираат грчките електронски весници, повикувајќи се на владини извори.
Варуфакис оставката му ја врачил на премиерот Алексис Ципрас.
Се смета дека неговото повлекување се должи на силниот притисок од своите политички противници за да постигне поповолни услови во преговорите со кредиторите за надминување на грчкиот долг, а, исто така, и на острите написи и лични напади врз него и неговата сопруга, кои, според медиумите, ја прелеале чашата.
Воедно и на својот профил на Twitter, набргу по објавување на резултатите од референдумот, напиша:
- Брзо по соопштувањето на резултатите од референдумот ми беше укажано дека некои членови на Еврогрупата и различни „партнери“ би преферирале мое „отсуство“ на своите средби, идеја која од страна на премиерот беше оценета како нешто што може да е од помош за да се постигне согласност. Поради тоа, денеска го напуштам Министерството за финансии“.
Името на новиот министер за финансии на Грција ќе биде соопштено по денешниот состанок на политички лидери.
- Јанис Варуфакис како министер за финансии играше водечка улога во преговорите од првиот ден на Владата. Премиерот чувствува потреба да му се заблагодари за неговте постојани напори да ги промовира ставовите на Владата и интересите на грчкиот народ, во многу тешки услови, изјави владиниот портпарол Гаврил Сакеларидис. Министерот за финансии Варуфакис денеска поднесе оставка „со цел да му олесни на премиерот во преговорите со доверителите“. Во писмото со оставка тој наведе дека „набрзо по објавувањето на резултатите од референдумот, од некои членки на Еврогрупата и партнери му било ставено до знаење дека неговото отстуство од состаноците е предност“. - Премиерот процени дека оваа идеја е потенцијално корисна за тој да постигне договор. Поради оваа причина, јас денеска си заминувам од Министерството за финансии, наведе Варуфакис.
Грчките медиуми, повикувајќи се на владини извори, тврдат деја најверојатно Варуфакис ќе го наследи заменик-министерот за меѓународни економски односи Евклидис Цакалотос.