Владеjачката СДП во Црна Гора најпопуларна меѓу партиите, Ѓукановиќ и Вујановиќ меѓу политичаритеПодгорица, 28 јули 2015 (МИА) - Владеачката Демократска партија на социјалистите во Црна Гора има највисок рејтинг меѓу политичките партии и ја има поддршката на 42,7 проценти од граѓаните, а претседателот Филип Вујановиќ и премиерот Мило Ѓукановиќ се највисоко оценети политичари во земјата, покажува истражувањето на Центарот за демократија и човекови права (ЦЕДЕМ), цитирано од националната телевизија РТЦГ.
Според резултатите од анкетата, трет најдобро оценет политичар е лидерот на новоформираната партија Демократска Црна Гора -Демократи, Алекса Бечиќ.
Второ по рејтинг е движењето ДЕМОС, предводено од Миодраг Лекиќ, кое ја има поддршката на 14,4 проценти од анкетираните, следено од партијата на Бечиќ со 9,2 проценти и Социјалистичката народна партија со 8,5 проценти.
Социјалдемократската партија, помалиот партнер во владеачката коалиција, се наоѓа на седмото место со 5,2 проценти.
Најдобра оценка од граѓаните, како и претходно, доби претседателот Вујановиќ (3,14), следен од премиерот Ѓукановиќ (2,98) и лидерот на демократите Бечиќ (2,64).
Најголема доверба меѓу институциите граѓаните му даваат на образовниот систем (59,1 проценти), претседателството (55,6) и Српската православна црква (55,2), а најмала доверба имаат политичките партии (34,6) и канонски непризнатата Црногорска православна црква (29,7 проценти).
|