Турција денеска и официјално го одобри договорот со САД, според кој на коалициските сили, предводени од САД, им се дозволува да ја користат воздухопловната база Инџирлик, недалеку од сириската граница, соопшти денеска турското Министерство за надворешни работи.
Како што пренесува Танјуг, спогодбата за користрење на базата исклучиво се однесува на борбата против Исламска држава и не ја вклучува поддршката од воздух за курдските борци на север од Сирија.
Договорот го склучија претседателите Барак Обама и Реџеп Таип Ердоган, за што уште минатата недела пишуваа американските медиуми. Тогаш беше објавено дека американските сили ќе ја користат базата на истокот на Турција за полетување на авионите и беспилотните летела во борбата против Исламска држава.
Турските воздухопловни сили и ноќеска ги гаѓаа позициите на курдските сепаратисти во Турција и во северниот дел на Ирак, а во пресметката со екстремистите во 39 турски провинции уапсени се 1.302 лица, соопшти канцеларијата на турскиот премиер.
Нападите на Курдите на северот од Ирак и во сама Турција почнаа минатата недела по серијата смртоносни напади низ Турција за кои вината беше префрлена врз ПКК, која Анкара и нејзините западни сојузници ја квалификуваат како терористичка група.
Турскиот претседател Реџеп Таип Ердоган вчера изјави дека мировниот процес со курдските бунтовници не може да продолжи во атмосфера на напади врз Турците.