Србија забрани влегување на товарни возила со хрватски регистарски таблички како и увоз на хрватска стока. Тоа е реципрочна мерка против ограничувањата од Хрватска за минувањето на мигранти преку заедничката граница, изјави српскиот министер за внатрешни работи Небојша Стефановиќ.
Над 44 илјади мигранти се во Хрватска од 16 септември досега.
До промена на миграцискиот бран дојде откако Унгарија ја затвори границата со Србија за мигрантите и тие се упатија кон Хрватска.
Од друга страна пак Танјуг известува дека исто така Хрватска забрани влез на нејзина територија за српски граѓани и автомобили, повикувајќи се на српската гранична полиција на преминот Батровци.
Откако на полноќ почнаа контрамерките на српската Влада спрема Хрватска, во државата не се дозволува влез на лица со српски пасоши. Автомобили и автобуси со српски регистрации се вратени од преминот Бајаково во Србија.