Сараево, 24 ноември 2015 (МИА) - Напад со експлозив е извршен синоќа врз полициска станица во централна Босна и Херцеговина, пишува „Јутарњи лист“.
Полициски претставници изјавија дека ноќта меѓу понеделникот и вторникот е фрлена експлозивна направа врз полициската станица во местото Завидовиќи и нагласија дека постои сомневање оти станува збор за нов терористички напад.
Портпаролката на Министерството за внатрешни работи на Зеничко-добојската жупанија, под чија надлежност е Завидовиќи, Алдина Ахмиќ изјави дека истрагата ја презело Обвинителството на БиХ, кое има исклучителна надлежност врз делата поврзани со тероризам.
- Постојат индиции дека во овој случај има елементи на кривично дело тероризам, така што постапувањето во овој случај го презеде Обвинителството на БиХ, кое ќе ја води натамошната истрага и по чиј налог е формиран заеднички тим на СИПА, Федералната управа на полицијата и Министерството за внатрешни работи на Зеничко-добојскиот кантон, кој ќе работи на собирање на оперативни сознанија, идентификување и лоцирање на извршителите, се наведува во соопштението на Министерството за внатрешни работи на жупанијата.
Според досегашните информации кусо по полноќ е регистрирана експлозија на покривот на помошната зграда, сместена во средишниот дел на полициската станица.
Во експлозијата нема повредени, а причинетата е мала материјална штета, која дополнително ќе се проценува.