Атина, 1 февруари 2016 (МИА) - До Нобеловиот комитет е поднесена официјалната кандидатура за доделување на Нобеловата награда за мир на жителите и волонтерите од грчките острови на Егејското Море, кои им помогаат на бегалците кои од Турција пристигнуваат на територијата на Грција, објави денеска електронското издание на атинскиот весник „Катимерини“.
Предлогот, Нобеловата награда да ја добие „Движењето за Егејска солидарност" беше доставен откако беа собрани 620.000 потписи во рамките на петицијата иницирана на интернет во ноември минатата година.
Иницијативата за оваа кандидатура е поддржана и од 230 академици од 111 универзитети.
Меѓу оние кои ја поддржуваат идејата престижната награда да им биде доделена на локалните жители на островите Лезбос, Кос, Хиос, Самос, Родос и Лерос, се и нобеловците Христофорос Писаридис и Дезмонд Туту, како и претставници на академските кругови од универзитетите во Оксфорд, Принстон, Харвард, Корнел и Копенхаген.
Од 900-те илјади бегалци кои влегоа во Европа минатата година, повеќето беа пречекани од жителите на грчките острови во Егејското Море. Локалните жители, вклучувајќи ги и рибарите, ја оставија својата работа и се вклучија во спасувачките акции во морето, се наведува во иницијативата доставена до Нобеловиот комитет.