Сараево, 10 февруари 2016 (МИА) - Босанската дијаспора во скандинавските држави предложи здружението „Мајки од Сребреница“, организацијата „Жени во црно“ и Институт за потрага по исчезнатите лица од Босна и Херцеговина за Нобелова награда за мир.
Предлогот на 30 јануари е испратен до Нобеловиот комитет во Осло.
- Самата номинација претставува симболичен акт, кој има за цел да го насочи вниманието на светската заедница кон трите организации, кои со посветеност, хуманитарна работа и борба за правда и вистина заслужуваат признание, изјави претставникот на босанската дијаспора Един Османчевиќ.