Картер: Мисија на НАТО против шверцерите на луѓе во Егејското Море

Брисел, 11 февруари 2016 (МИА) - НАТО ќе почне со подготовка на мисија во Егејското Море, меѓу Турција и Грција, за да помогне во спречување на шверцерите на луѓе кои превезуваат мигранти и бегалци, изјави денеска во Брисел секретарот за одбрана на САД, Ештон Картер.

Изјавата на Картер доаѓа непосредно по јавното барање на три земји-членки на Алијансата - Турција, Грција и Германија, за вклучување на НАТО во справувањето со бегалската криза со која се соочува Европа.

Министрите за одбрана на земјите-членки на Северноатланската алијанса се собрани во Брисел на состанок на кој главна тема е бегалската криза.

Според шефот на американскиот Пентагон, еден нацрт-план за ваква операција, треба да изработат во најкус рок воените власти на земјите членки, кој потоа би можел брзо да биде имплементиран.

- Целта на операцијата треба да бидат криминалните организации кои ги експлоатритее овие недолжни луѓе (мигрантите и бегалците) и нивната судбина, за да заработуваат пари, изјави американскиот секретар Ештон Картер.