Анкара, 11 февруари 2016 (МИА) - Во моментот 50.000 сириски бегалци се движат кон турска граница и тој број може да достигне до 1,5 милиони луѓе ако градот Алепо биде целосно бомбардиран, изјави денеска тускиот министер задолжен за европски интеграции Волкан Бозкир.
Претходно, турскиот претседател Реџеп Таип Ердоган ги нападна ЕУ и Обединетите нации поради притисокот кој се врши врз Турција да ги отвори своите граници за бегалците, заканувајќи се дека ќе испрати милиони бегалци, кои се наоѓаат во Турција, во други земји.
- Нас не ни пишува на чело дека сме идиоти. Немојте да мислите дека авионите и автобусите таму се без причина. Ние ќе го направиме тоа што е неопходно, истакна Ердоган.
Тој додаде дека Турција има трпение до одредено време.
- Постои можност од доаѓање на нов бран бегалци од 600.000 луѓе доколку продолжат воздушните напади. Се подготвуваме за тоа, наведе Ердоган.
Во Турција сега се наоѓаат околу 2,6 милиони бегалци од Сирија.