Брисел исклучува кризно сценарио за Грција, слично на тоа од 2015 година

Брисел, 3 мај 2016 (МИА) - Европската комисија денеска ја исклучи можноста од „кризно сценарио“ за Грција, слично на тоа што се појави во 2015 година, кога земјата беше на работ на излегување од еврозоната.

Истовремено, Брисел изрази воздржан оптимизам за можностите идниот понеделник да биде постигната спогодба за грчките реформи, пренесува БТА.

- Нема никаква причина да се наметнува кризно сценарио за грчката програма затоа што сегашната ситуација е различна од таа што беше создадена минатата година и во однос на вкупната работа, економските резултати и реформите по кои во моментов течат преговорите, изјави еврокомесарот за економски и финансиски прашања Пиер Московиси.

Московиси беше запрашан какви се шансите Грција и нејзините кредитори (ЕУ и Меѓународниот монетарен фонд) да постигнат спогодба за реформите, што се бараат од Атина, во врска со вонредната средба на министрите за  финанси од еврозоната, закажана за 9 мај во Брисел.

- Сакам да изразам разумен оптимизам, тоа не се лесни теми, нештата бараат многу енергија, многу работа, но мислам дека има пат, изјави Московиси.

Средбата, предвидена за идниот понеделник, првично беше планирана за 29 април. Се наметна потребата таа да биде одложена заради разликите меѓу Атина и ММФ за начините за почнување на новата серија реформи.

Со заслабено темпо на намалување на бруто домашниот производ на Грција од - 0,3 отсто, годинава земјата ќе биде во рецесија и ќе биде единствената со таков резултат меѓу земјите кои ја воведоа единствената европска валута, покажуваат пролетните прогнози на ЕК, што денеска беа претставени во Брисел.