Црна Гора: Опозицијата реши да се врати во парламентот по седуммесечниот бојкот

Подгорица, 4 мај 2016 (МИА) - Црногорската опозиција одлучи денеска да се врати во парламентот, по повеќе од седум месеци бојкот на работата на законодавниот дом поради несогласувањето со политиката на премиерот Мило Ѓукановиќ, вклучувајќи го и пристапувањето на Црна Гора кон НАТО, јавува Танјуг. 

На синоќешните протести пратениците од опозицискиот Демократски фронт изјавија дека ќе се вратат во парламентарната сала „за да ги разобличат предавниците“ од другите опозициски партии. 

Денешната закажана седница, на која требаше да се разговара за реконструкција на Владата и смена на претседателот на парламентот Ранко Кривокапиќ, беше одложена. 

Причина за тоа беше судир меѓу обезбедувањето на парламентот и пратениците од Демократскиот фронт, кои не дозволија да бидат претресени. 

На крај пратениците успеале да влезат во парламентот, да рашират натпис „Слобода или ништо“ и да скандираат „Мило Ѓукановиќ е крадец“. 

Бројот на обезбедувањето во црногорскиот парламент денеска бил значително зголемен.