Челик: ЕУ не е единствената варијанта за ТурцијаАнкара, 25 мај 2016 (МИА) - Односите на Турција со Европската Унија се многу важни, но тоа не е „единствената варијанта“ за Анкара, изјави денеска новиот турски министер за ЕУ, Јомер Челик.
- Перспективата за полноправно членство на Турција во ЕУ е дел од државната политика на Турција и ние и натаму се движиме во таа насока. За нас тоа е многу важно, но не е и единствена варијанта за Турција, изјави Челик на церемонијата на стапување на должноста. Тој додаде дека односите со ЕУ во моментов се на крстопат, пред се, заради „регионалните и светските кризи“, пренесе ТАСС.
Челик, кој на функцијата го замени Волкан Бозкер, пред новинарите кажа дека Турција од ЕУ бара да се откаже од „двојните стандарди“ во борбата со тероризмот.
Новиот министер истакна дека оваа борба е реализација на законското право на Турција да се брани, а тероризмот претставува закана за нејзината внатрешна безбедност.
Турскиот претседател Реџеп Таип Ердоган вчера ја предупреди ЕУ дека Анкара може да ја преразгледа спогодбата со ЕУ, доколку Брисел продолжи да инсистира на дополнителните услови за безвизен режим, кои вклучуваат и промени во турскиот закон за борба со тероризмот, потсети ТАСС.
|