„Дојче веле“: Иранските муџахедини во Европа се закана за безбедноста

Берлин, 30 мај 2016 (МИА) - Кога иранските муџахедини повеќе не му беа потребни на Пентагон, Американците пред повеќе од десет години ги разоружаа и ги сместија во Албанија, каде претставуваат потенцијална опасност за граѓаните на таа земја и за Европа, објави „Дојче веле“.

Како што се наведува во репортажата на „Дојче веле“ се претпоставува дека во Албанија живеат околу 800 припадници на иранските, народни муџахедини, кои Владата во Тирана ги прифати на хуманитарна основа, како борци кои повеќе не учествуваат во вооружени судири.

- Некогашните учесници во борбите на Блискиот Исток претставуваат голема опасност за безбедноста, бидејќи се добро обучени и секогаш подготвени да ги употребат своите вештини кои со години ги стекнувале. Во Албанија имаат уште една предност, а тоа што овде не е тешко да набават оружје, посочи албанскиот експерт за безбедност Артан Хоџа.

Тој додаде дека Техеран е одлучен да ја уништи организацијата на народните муџахедини, бидејќи претставува закана за Иран.

Репортерите на „Дојче веле“ посетија еден од камповите каде живеат муџахедините и користејќи скриена камера, разговараа со двајца припадници на милитантната организација.

- Активни сме секаде во светот - во Европа, во САД, а посебно во Иран, но немаме никаква поврзаност со тероризмот и насилството, изјави еден од муџахедините.

Тие тврдат дека и поранешните членови на организацијата не добиваат закани и оти тоа е пропаганда на иранскиот режим.

Владата на Албанија одбила да даде официјален одговор на прашањата на „Дојче веле“ за муџахедините во земјата.