Повторно функционира товарниот железнички сообраќај преку грчко-македонската граница

Атина, 31 мај 2016 (МИА) – Претпладнево од Солун замина товарен воз преку Македонија кон Централна Европа, а вториот се очекува во текот на денов, по отстранувањето на блокадата на железничката линија кај Идомени која траеше од 21 март.

Тимови на грчкиот железнички оператор „ТраинОсе“ деновиве ја завршија проверката на железничката линијата која беше блокирана од страна на бегалците кои беа сместени во Идомени, и беше ослободена откако мигрантите и бегалците беа преместени во други прифатни центри.

Првиот воз по 70-дневната блокада поминал минатата недела, во четвртокот, но бил без товар.

Планот на „ТраинОсе“ е до крајот на неделава целосно да се нормализира железничкиот сообраќај и да има по седум товарни возови дневно. Пред блокадата, дневно по оваа пруга поминувале по девет товарни возови.