Вашингтон, 21 ноември 2016 (МИА) - Турскиот претседател Реџеп Тајип Ердоган изјави дека е разочаран од Администрацијата на Барак Обама поради нејзиниот пристап кон бегалците од Блискиот Исток и затоа што не го екстрадира исламскиот проповедник Фетулах Ѓулен, кого Турција го обвинува за обидот за преврат.
- Тие не се зафатија со настаните и немаа сериозен пристап кон овие прашања, рече Ердоган по повод бегалскиот проблем во интервју за емисијата „60 минути“ на телевизијата Си-Би-Ес.
Турција прими околу три милиона бегалци од Сирија и другите земји, речиси двојно повеќе од вкупниот број бегалци во Европа.
Ердоган во интервјуто уште изјави дека САД треба да и го предадат на Турција Фетулах Ѓулен, кој од 1999 година живее во Пенсилванија. Турската Влада и претседателот го обвинуваат Ѓулен дека стои зад изведениот обид за преврат од 15 јули и заради тоа презедоа масовни чистки и апсења на лица во Турција за кои се сомневаат дека се негови следбеници.
Чистките Ердоган ги оцени како законски и умесни.
Според него, додека Ѓулен не биде екстрадиран турската јавност ќе верува дека САД го поддржале пучот.
- Овој човек е лидер на терористичка организација која го бомбардираше мојот Парламент, рече Ердоган, додавајќи дека Турција екстрадирала во САД осомничени за тероризам и затоа истото го очекува од својот американски сојузник.
Во вчера емитуваното интервју за Си-Би-Ес, Ердоган уште посочи дека Анкара сега нема намера да ги преоценува своите односи со САД и НАТО.