Москва го предупреди Загреб да се занимава со сопствените проблемиМосква, 22 ноември 2016 (МИА) - Русија го повика официјален Загреб да не им нуди на Украинците искуства за „мирна реинтеграција“, туку да се занимава со решавање на сопствените проблеми поврзани со правата на Србите и другите национални малцинства во Хрватска.
Имено, Москва смета дека хрватските проблеми на тој план се хронични.
Тоа е објавено во соопштението на Канцеларијата за информирање и медиуми при руското Министерство за надворешни работи и претставува реакција од Москва на предлогот од хрватскиот премиер Андреј Пленковиќ дека Загреб треба да и пренесе на Украина сопствени искуства за мирна реинтеграција на окупираните територии.
Пленковиќ овој предлог, кој предизвика „сериозна загриженост“ во Русија, го изнел за време на неодамнешната посета на Киев и, според него, тоа може да се примени на подрачјата на источна Украина - Доњецк и Луганск, каде се води војна и каде што се создадени парадржавни творби.
|