Анкара, 2 декември 2016 (МИА) - Колку што ние имаме потреба од Турција, толку и таа има потреба од Европа, изјави претседателот на Европската комисија, Жан-Клод Јункер пред шпанските новинари во Мадрид, јави весникот „Паис“.
Јункер изјавата ја дал вчера во коментар за односите Турција-ЕУ, за време на својата официјална посета на шпанската престолнина.
Во одговор на прашањата во врска со кризата со бегалците во Европа Јункер изрази став дека Турција нема да се повлече од спогодбата за реадмисија.
-Ердоган треба да престане да не обвинува за тоа дека турските граѓани не можат да патуваат без визи во Европа, истакна претседателот на ЕК.
Тој додал дека доколку Турција не ги исполни 72-та критериуми, што му ги бара Брисел, одговорноста за тоа не е на ЕУ.
Јункер изјави дека има доверба во турскиот претседател Ердоган дека нема да го остави турскиот брег во раце на криминалните организации и на шверцерите на луѓе.