Анкара, 2 декември 2016 (МИА) - Тепањата и малтретирањата се широко застапени во затворите во Турција, особено во периодот по неуспешниот обид за преврат од јули годинава, изјави денеска експертот на ОН, Нилс Мелцер, кој предупреди дека затворите и притворите во земјата се преполни, јави ДПА.
Мелцер, како специјален известувач на ОН за проблемите на тепањата, изјавата ја даде на крајот од својата шестдневна посета на Турција.
- Повеќето од посетените објекти беа преполни, а нивната искористеност варираше од 125 до над 200 проценти од капацитетите на објектите, изјави Мелцер.
Мелцер беше критичен за мерките, што се воведени по вонредната состојба во Турција, изјавувајќи дека луѓето без судска одлука во притвор се држат и до 30 дена, како и до пет дена без достап до адвокат.
- Ќелиите во притворите, во кои во моментов се држат луѓе до 30 дена без пристап до чист воздух, не се погодни за таа намена ни до 48 часа, рече Мелцер.
Експертот посочи дека во Турција има „клима на заплашување“, што ги обесхрабрува луѓето да поднесуваат жалби. Тој ги повика турските власти подобро да ги истражат тврдењата за малтретирање.
Турција во притвор држи околу 37.000 лица, пред се, заради нивно наводно учество или врски со неуспешниот обид за преврат.