Во моментов во ЕУ има еднаков процент на поддршка и противење на проширувањето, изјави денеска во Брисел еврокомесарот за проширување Јоханес Хан во обраќањето на конференцијата „Балканот: Зголемување на поврзаноста на патот кон ЕУ“, чиј организатор е невладината организаицја „Пријатели на Европа“.
Како што јави дописникот на МИА од Брисел, Хан посочи дека во многу делови на Европа, поддршката за овие активности не е голема.
- Денес има еднакво мнозинство и против понатамошно проширување на ЕУ. Не можам да предвидам ден, но за време на мојот мандат сакам земјите да одат напред и да направат неповратна база за европските аспирации. Важно е и за стабилноста и безбедноста, како за регионот, така и за нас како ЕУ. Меѓучекор е регионална соработка, како Берлинскиот процес, на пример, преку конкретни мерки во областа на транспорт, поврзаност, енергија, единствен балкански пазар и сл., истакна Хан.
Според него, Брисел не е заглавен со проширувањето, но тој посочи дека е важно да се сфати дека по големото искуство со проширувањето, сега имаме нова ситуацијата во Европа и меѓу земјите членки, како и нова ситуација кај кандидатските земји.
Тој истакна дека земјите кандидати мора да сфатат дeка не доволно само да се усвои европското законодавство и да се прифати, туку и да се имплементира.
- Во демократијата се потребни и добри компромиси што ќе бидат добри за двете спротивставени страни. Потребен е кредбилен учинок, што ќе ни даде уверување дека земјата е подготвена. Не можеме да ја оставиме на страна и економската ситуација во Европа и во регионот. Сакам да притиснам за економски развој на земјите, да се даде перспектива на луѓето таму со цел тие да не се селат. Да имаат можности за работа за себе и за семејствата. Но, треба време за тоа, истакна Хан.
Комесарот за проширување на ЕУ посочи дека најдобрите млади луѓе емигрираат, додавајќи дека како поранешен австриски министер за наука и истражувања, уште пред десет години имал искуство со прашањето за одлив на мозици.
Според Хан, никогаш нема да се привлечат странски инвеститори, бидејќи тие нема да ризикуваат пари ако нема независност на судството.
- Треба да ги убедиме граѓаните на Европската унија колку е важно идното проширување со пријатели од Западниот Балкан. Обединувањето на Европа е прв важен чекор, а тоа беше големото проширување во 2004 година. Вчера на состанок со министрите за транспорт од шесте балкански земји во врска со Самитот во Италија следното летото, утврдивме дека е потребен напредок и во економска ситуација и во основните начела, нагласи Хан.