Атина, 14 февруари 2017 (МИА) - Мнозинството Грци се незадоволни од двегодишното владеење на левицата СИРИЗА во Грција, покажа универзитетското истражување на јавното мислење.
Осумдесет и еден отсто од анкетираните не го одобруваат дејствувањето на Владата за овие две години, а 62 проценти од избирачите, кои гласале за СИРИЗА на последните избори во септември минатата година, исто така се незадоволни од управувањето на левицата.
Девет од десет Грци сметаат дека земјата се движи во погрешна насока.
Истовремено конзервативците од Нова демократија се на пат да добијат гласови, кои при евентуални избори би можеле да им обезбедат самостојно владеење. Доколку сега се одржат избори Нова демократија ќе добие 33 отсто од гласовите, а СИРИЗА 16,5 проценти.
Трета партија е неонацистичката Златна зора со 7,5 отсто, а по неа следува Комунистичката партија со седум проценти. Петти е Демократскиот блок (ПАСОК-ДИМАР) со 6,5 отсто.