Тирана, 28 февруари 2017 (МИА) - Во две одделени акции, едната во албанскиот приморски град Валона, а другата во близина на пограничниот град Коница, запленети се 1.240 килограми албанска марихуана.
Албанската полиција, во рамки на акцијата „Форест“, на позната плажа Зврнец, кај Валона заплени 900 килограми марихуана и уапси шест лица на возраст од 24 до 49 години.
Дрогата била откриена на педесеттина метри од морскиот брег, кога била подготвувана да биде натоварена на голем моторен чамец, кој требало да отплови во правец на италијанскиот брег.
Грчката полиција уапсила албански државјанин и запленила 340 килограми марихуана на само неколку километри оддалеченост од грчко-албанската граница,во близина на градот Коница.
Крајната дестинација на дрогата бил атинскиот нарко пазар.
Во изминатите два месеца од годинава, албанската, италијанската и грчката полиција имаат запленето над 30 тони марихуана произведена во Албанија. Само во две акции во италијанскиот град Анкона овој месец запленети се 18 тони, од нив 8 тони на дванаесетти, додека 10 тони на 19 февруари.