Бугарската армија не може целосно да го гарантира националниот суверенитет

Софија, 12 април 2017 (МИА) - Вооружените сили на Бугарија се само делумно во состојба да ги исполнуваат обврските за гарантирање на националниот суверенитет и за адекватно учество во структурите на НАТО, изјави денеска бугарскиот заменик-премиер и министер за одбрана Стефан Јанев.
По седницата на бугарската Влада на која беше усвоен годишниот извештај за состојбата во одбраната и Вооружените сили, Јанев оцени дека се констатирани „бројни околности кои со години биле посочувани и нагласувани“.
Според него, главен проблем на бугарската Армија се недостигот на средстава за финансирање во последните години, поради што бројот на припадниците на армискиот состав е за 25 до 30 проценти помал од потребите на одбраната.
Јанев најави дека Бугарија ќе подготви национален план за зголемување на трошоците за одбраната до два одсто од бугарскиот БДП до 2022 година, согласно одлуката од Самитот на НАТО во Велс.