Тирана, 27 април 2017 (МИА) - Спикерот на албанскиот парламент и лидер на Движењето за социјалистичка интеграција Илир Мета, искажа разочараност од неучеството на опозицијата на средбата, што тој ја свика со парламентарните партии, со цел да се разговара за политичката криза и измени во изборнот законик.
- Опозицијата не покажува волја за решавање на политичката криза, бидејќи таа дијалогот го поистоветува со ултиматумот. Од страна на владејачкото мнозинство направени се неколку значајни чекори за создавање што покоструктивна клима на доверба, но, се подразбира, опозицијата има агенда која не е во прилог на процесот и на самата опозиција, изјави Мета по средбата.
Тој смета дека партиите треба да седнат и да разговараат за измени во изборниот законик од 2008 година ,кој „и сега ги држи изборите во темина“.
- Треба да се направи се за гласот на граѓаните да биде праведен и рамноправен. Ние се ангажираме да придонесеме за политичко решение. Треба да придонесеме оваа предкриза да не не однесе во состојба на незадоволство. Овој изборен законик не им ја донесе на граѓаните демократијата која ја посакуваат и ја носи земјата од криза во криза, посочи Мета.
Овој чекор на Мета следуваше ден по неуспехот на преговорите на главните политички партии, Социјалистиката партија, Движењето за социјалистичка интеграција и Демократската партија, со посредство на европските пратеници Кнут Фленкенштајн и Дејвид Мекалистер.
Парламентарните избори се закажани за 18 јуни. Рокот за пријавување кандидатури Централната изборна комсија го продолжи до 29 мај. Опозицијата најави бојкот на изборите, барајќи формирање техничка влада, која ќе спроведе слободни и фер избори. Актуелнот премиер и лидер на социјалистите Еди Рама, повеќе пати повтори дека избори ќе има и без опозицијата.