Полицијата во Скадар заплени 115 килограми марихуана

Тирана, 19 јули 2017 (МИА) - Полицијата во северниот албански град Скадар заплени 115 килограми марихуана, која најверојато требало да биде прошверцувана преку албанско-црногорската граница кон западноевропскиот нарко пазар.
Како што јави дописникот на МИА, во полициската акција наречена „Околина“ е уапсен еден 46-годишен жител на Скадар во чија куќа при претрес била откриена дрогата.
Дрогата била пакувана во 87 пакетчиња, кои биле ставени во десет вреќи.
Против приведениот е покрената кривична пријава под обвинение за „производство и продажба на наркотци“.
Претходно, албанската полиција во еднодневна масовна акција во неколку населени места заплени 18 тони марихуана подготвена за транспорт и уапси 12 лица, меѓу кои и двајца полициски службеници.