Демирташ: Никој нема можност за праведен судски процес во ТурцијаАнкара, 19 јули 2017 (МИА) - Лидерот на турската прокурдска Демократска партија на народите, Селахатин Демирташ, кој се наоѓа во затвор, изјави во интервју дека не постои судија кој може да му се спротивстави на претседателот Реџеп Тајип Ердоган и изрази сомнеж дека некогаш би можело да има праведен судски процес за него. Демирташ е еден од повеќето пратеници на прокурдската партија, кои се уапсени при акциите на турските власти по неуспешниот обид за преврат во јули минатата година. Повеќето од нив се обвинети за поврзаност со Курдската работничка партија (ПКК), која е прогласена за терористичка организација од страна на САД, Турција и Европа, но сите пратеници ги демантираат таквите тврдења. - Одлуката за моето и апсењето на моите колеги е политички мотивирана. Моментно судскиот систем во Турција е под целосна контрола и притисок на владејачката Партија на правдата и развојот. Никој нема можност за праведен процес, истакна Демирташ. Тој изрази жалење бидејќи „ниту еден судија во Турција не може да им се спротивстави на незаконските и криминални коментари на Ердоган“. - Судиите се соочуваат со опасност да бидат сменети, да добијат отказ или да бидат уапсени. Се разбира, одговорни се Ердоган и судиите кои го поддржуваат, нагласи Демирташ.
|